من حضن أطفالها إلى الزنازين.. شهادة أسيرة واجهت الرعب وحدها

كتبت: غيداء كمال العبادسة

مع تواصلي المستمر مع الاسيرات المحررات,  صارت شهاداتهنّ عندي أمانة لا يجوز أن تُدفن في الصمت.
واليوم في مقابلتي مع الأسيرة المحررة نيفين ناصر هاشم النجار وثّقتُ حكاية نزوحٍ واعتقالٍ وقهرٍ ترك أثره بعد الحرية… لتبقى شهادةً حيّة لا تُنسى.

كنت عند أهلي. رحت يوم الخميس، وبداية الحرب كانت يوم السبت… والله
خفت أرجع. صرت يوم عن يوم، يوم عن يوم… وقعدت تقريبًا خمسين يوم عند أهلي وأنا خايفة ومرعوبة. وجوزي صار يقول لي: روحي… روحي… روحي… روحي. فقررت أرجع، ويومها كنت مفكرة إنه هدنة. وأنا بالطريق قالوا: اليوم مش هدنة… قلت خلاص، والله لأروح.

أخذت أولادي، وأخذت شنطتي وأخذت كل أغراضي، وطلعت على الجنوب. جوزي كان بيستناني بالنصيرات بعد الخط الفاصل. مشيت مع الناس، وكان معي بنتين من دار الغفري: وحدة عمرها 11 ووحدة 13. وصلنا عند ممر نتساريم… اللي فيه الجيش. كنت ماشية وأنا حاملة “جودي” بحضني و“دودي” ماسكاها. جودي كانت أقل من سنتين، كنت فاطماها. اعتدال كانت ثلاث سنين، وأحمد كان خمس سنين… أحمد هو الكبير.

وأنا بالممر طلع واحد ونادى: “أم جلباب البنفسجي تيجي”… كان قصده عليّ. وأنا ماسكة أولادي. قال لي: “سيبي أولادك وتعالي”. انصدمت. أنا كنت مفكرة أسئلة وبس… ما كنت متوقعة اعتقال. سلّمت بنتي للبنات اللي كانوا معي وقلت لهم: ديروا بالكم على بناتي. وبلشت أعيّط وأصرخ من الخوف.

أحمد حاول يلحقني… بس قالوا له: “روح… عدّوا… ماما بتجيك”. أنا ما ودّعتهم… ما حكيت لهم ولا طمنتهم… لأنه أصلًا ما كنت متوقعة إنهم ياخدوني هيك. النظرة اللي شفتها وهم بروحوا قدّامي… أقسم بالله… طول الشهرين ما راحت من بالي.

وقفوني مع الناس. بعدين نادوني وسألني عن اسمي وتاريخ ميلادي، قلت: نيفين ناصر هاشم النجار، 20/4/1998. قال: “روحي عند الناس”. بعد دقيقة رجع قال لي: “روحي عند العلم الأخضر”. هون أنا انهرت… صرت أعيط وأهلوس وأصرخ: إيش العلم الأخضر؟! كنت عارفة إنه اللي بروح هناك مش بروح دغري.

بالصدمة تركت أغراضي. ما كنت شايفة غير أولادي. وكانوا يحكوا لنا كلام يقطع القلب… “راحت عليكم”… وأنا كنت أدعي على حالي: يا رب إذا بدهم يعملوا فيّ حاجة… أموت وأروح عندك عسى ما يصير فيّ حاجة. كانوا يهددونا، حكولنا: “راح نغتصبكم”. وأولها حكولي: “راح نقتل جوزك… حنقتل جوزك كمان”. ومع هيك، أنا أيامها ما رضيت أحكي حتى مكان جوزي… ما حكيت.

دخلوني على التفتيش… وكانوا ينادوا: “اشلحي” قدّام الدنيا. من الرعب شلحت بسرعة… وبعدها قالوا: “البسي”. لبست وأنا برتعش. وبعدين كلبشوني وغمّوا عيوني… وصاروا يسحبوني زي الكلب. خبط على الراس، مسبّات، وإهانات… وكل ما أضعف أو أحكي كلمة… يزيدوا الضرب.

أخذوني على تحقيق وأنا مغمّية. خوف ورعب… لأنّي أنا ما بعرفش حاجة. كانوا بدهم يطلعوا منك كلام غصب. وكنت أقول لهم: ما بعرف. كانوا يحكوا: جاوبي عشان تروحي لأولادك… وأنا مش مستوعبة أصلًا وين أولادي، عايشين ولا ميتين.

بعدها نقلونا… وبالطريق كان ممنوع النفس يطلع. كانوا يغطّونا، ويخبطوا علينا… وإذا وحدة بكت أو طلّع صوت… ينزل فيها ضرب. أنا من كتر الخوف والقهر كنت أحس نفسي بدي أموت. وصلونا على مكان عند غلاف غزة… كان البرد رهيب، وإحنا أصلاً لابسين خفيف لأن غزة كانت شوب… هناك كان تلج. قعدونا على الأرض ساعات وإحنا مكلبشين ومغمّيين… والخبط على الراس مستمر… وأصوات تعذيب حوالينا… وكنت أدعي: يا رب خلّص… إذا بدهم يعملوا فيّ إشي، أموت أهون.

بعدها ودّونا على معتقل. ما شفته كويس لأني كنت مغمّية… بس كان مليان جنود وكلاب ومكان محوّط. أولها شفت كيف بيمسكوك زي الكلب… غلط ومسبّات وخبط على الراس. قعدنا ساعات قليلة… وبعدها قالوا لي: “إلك تحقيق… وإذا جاوبتي بتروحي لأولادك”… وقالوا: “11 يوم”. من أول ما قالوا 11 يوم وأنا أعيط وأعيط… إيش 11 يوم؟ مين بده يقوم بأولادي؟ وأنا أصلًا مش عارفة أولادي عايشين ولا ميتين.

بعد هيك أخذونا على معسكر اسمه “عنتوت”. كانوا يمسكونا ويقولوا لنا: “وقعي”… نوقع غصب. المعسكر كان مفتوح… فرش خفيفة وبطانيات خفيفة… بلا مخدات… وكاميرات من كل الجهات، حتى عند الحمام. وكنا ننقل المي يوميًا. كنا عشرة بنات… ممنوع نحكي ولا كلمة. كنا نسمع الأذان… ونصلي على قد ما نقدر. يوميّاتنا صارت صمت وخوف وانتظار… كل يوم يوعدونا: “حنجيب لك جوال تطمني على أولادك”… ولا يجيبوا شي. من كثر العياط كانوا يعطونا مهدئات عشان ننام… كأنه “كرم”، وهو قهر فوق قهر.

وقت التحقيق… كلبشوا إيدي وإيدي ورجلي ورجلي وربطوني على كرسي، وغمّوا عيني. المحققة كانت بتحكي عربي… وقاسية جدًا. قالت: “معلوماتك كلها عندي”. وصارت تسأل عن جوزي: حماس ولا جهاد؟ قلت: لا. قالت: جوزك محامي مع حكومة حماس. قلت: لا… جوزي محامي، بطلّق ناس وبقبض من الناس. سألت عن أبوي وإخواتي وأعمارهم، وعن أولادي وأعمارهم… وبعدين دخلت بأسئلة تقهر وتجرح: لما تقعدي مع جوزك إيش بتحكوا؟ ومع حماتك إيش بتحكي؟ وأنا أقول: عادي… بنطمن… بنتفرج… أنا ربة بيت… بعجن وبغسل وبعمل أكل وبنام… عندي ثلاث أطفال صغار. وكل شوي: “كذابة… غبية… متخلفة”. جابت صورة بيتنا وقالت: ليش بيتكم مقصوف؟ قلت لها: إيش السبب؟ إنتِ أدرى. وزادت سبّ وإهانة.

بعد حوالي ثلاث ساعات صرت أعيط عياط هستيري… وبلشت أهلوس. جابوا دكتور… وقالوا: جاوبي عشان تطلعي. وأنا شو أجاوب؟ كل اللي عندي طلعته. كلبشوني وغمّوا عيني وجرّوني… وأي حركة خبط وضرب.

بعدها نقلونا على “الدامون”. الطريق كان طويل، أغاني بصوت عالي وصياح وخبط على الراس. هناك أخذونا للمدير… سأل أسئلة كثيرة عني وعن جوزي وشغله وعن أعمار أولادي وإخواتي بالتفصيل. وبعدين دخلنا. في الدامون كان أهون شوي: فيه صابون وفيه شوية نظام… بس القهر الأكبر إنه أنا لسه ما بعرف عن أولادي ولا عن أهلي.

بالدامون تعرفت على آية الخطيب… أول ما شافتنا حضنتنا. بكيت بحضنها وأنا ما بعرفها… بس كانت تحاول تهوّن علينا. وكان فيه نائب مدير اسمه غسان… كنت فاكراه أولها منيح… وبعدين اكتشفت قسوته. مرة قال لي: “بتفكري أخليك تطمني على ولادك؟ هذا في أحلامك”. وكان يهدد: “إذا تجينا تاني برجليكي مش حتروحي من هون”. وكان يعطي أمل وبعدين يشيله: “حنخليك تشوفي أولادك”… وبعدين ولا شي. ومرة قال لي: “شفتي خانيونس تبعتك؟ كلها دمرناها خالص”.

بالدامون كنا كتير… السراير فوق بعض، ست سراير… وإحنا كنا حوالي 12 بنت، والباقي على الأرض. كل وحدة إلها حرامها ومخدتها وفرشتها. الدنيا كانت ساقعة… بس لما نكون كتار، النفس يدفّي شوي. الغرف كانت ملزقة جنب بعض، تقريبًا 13 غرفة بشكل دائري. ما كان في حرس جوّا الغرفة طول الوقت، بس كانوا كل شوي يجوا يعدّونا… أربع لخمس مرات باليوم… ولازم كل مرة نقف، حتى العجوز اللي عمرها 85 سنة لازم تقف. أول ما دخلت أنا ما كنت عارفة… قعدت… اتبهدلت بهدلة، ومن بعدها صار لازم نقف كل مرة.

كانوا مسكرين علينا الغرفة “مية تسكيرة”. ومع هيك كنا نقرأ قرآن… كل تنتين يقرؤوا مع بعض، وأحيانًا بصوت عالي… وإيمان محفوظ كانت تعطينا أحكام. كانت صغيرة، 22 سنة، ومش متجوزة. وبنات الضفة كان معهم ساعة يحددوا فيها أوقات الصلاة، وبعدين منعوهم.

طلبنا محامي… طلبنا اتصال… طلبنا أي حاجة… كله ممنوع، ممنوع، ممنوع. حتى الأخبار اللي كانت توصلنا كانت كذب… يحكوا مثلًا: المحامي قال جوزك برفح… وأنا لما طلعت اكتشفت إنه مش برفح أصلًا.

يوم 30/12 كان عيد ميلاد بنتي جودي… أقسم بالله عيطت كتير… كنت أقول للبنات: اليوم عيد ميلاد بنتي وأنا مش معاها… بنتي عايشة ولا ميتة؟ سنتين صارت يومها… وأنا ما عندي أي خبر… ولا أي طمأنة.

وجابوا بنات كثير من غزة… صغار 15 و18… وكل ما يدخلوا، القهر يزيد. وأصعب موقف لما جابوا العجوز… عمرها 85… كانت حالتها بتقطع القلب… ومن هون كنت أحس إنه “موت أحمر”. وكان عندنا بنت من غزة اسمها شذى… عمرها حوالي 20… قوية وشاطرة. تحقيقها طلع ربع ساعة بس… لأنها عرفت كيف تحكي لهم: “إنتو ليش جايبيني هان؟ أنا ما بعرف حماس ولا الجهاد… أنا كنت بدي أتعلم، وبسببكم قامت الحرب وتحطمت أحلامي”… وما جاوبت على شي، وتركوا حالها.

بعد حوالي 8 أو 9 أيام… نزلوا الجنود. طلعوا بنات “أفراج”: سائدة، نعمة، أفنان، لينة… ولينة طبيل، وأسيل، وظريفة… وإحنا أنا وإيمان بنتفرج ومقهورين… وأقول: دخلونا معاكم يا جماعة أمانة. ظلّوا البنات ساعتين وثلاث ساعات لابسات وجاهزات… وأنا بتطلع وبعيط… وبقول: بكفي يا نيفين… أولادي هلقيت عايشين ولا ميتين؟ وتذكرت كلام غسان: “نيفين مش حتطلعي”.

وبآخر دقيقتين قالوا: “في ثمان بنات بدهم يطلعوا”. قلت مين التنتين الزيادة؟ وفجأة سمعت الاسم: “إيمان… ونيفين”. أقسم بالله صرت زي الطفلة الصغيرة بتنط… صليت صلاة شكر… وقلت: يا الله الحمد لله… بدي أطلع أشوف أولادي. ودعنا بنات الضفة وإيد وحدة كانت مفكوكة عشان نودّع، وهم يبعثوا لنا: الله يسهل عليكم، إن شاء الله توصلوا لأولادكم.

طلعونا على باص مسكر… مغلق… ما فيه إلا شباك صغير بعيد، بس يدخل هوا ونور. مكلبشين إيدينا ورجلينا. وبعد ساعات أخذونا على سجن ثاني… “لجهنم”. قلت للبنات: ديروا بالكم… البسوا توب الصلاة… والله حيعذبونا وبعدين يروحونا… مش حيروحونا هيك بسهولة. فعلًا… شلحونا، وخلونا بالبرد رافعين إيدينا ساعات… وبعدين لبسونا الرمادي.

ودونا على بئر السبع… وكان جنبنا الرجال بقسم ثاني… نسمع أصوات تعذيبهم. كنت أحكي: والله العظيم لو إنه الشاب يستشهد أحسن من جهنم هذا. السجن كان له مواعيد: نصحى 6 وننام 10… وإحنا مغمّيين ومكلبشين. وأنا كان يغمى علي من كتر ما كانوا يضربوني براسي… وهذا كله وهم بيسموه “إفراج”. لا تحقيق ولا أي شي… بس عذاب.

قعدنا تقريبًا 3 أيام. الأكل قليل جدًا: توست مع لبنة… ومرة توست مع مربى… إذا ما أكلتي بنفس اللحظة بياخذوه. علاج؟ ممنوع. كل شي ممنوع. وكانوا يخلونا نحط إيدينا على الأرض ونقعد “بالأربع” ساعات… وإذا إيدك تشنجت أو تعبت… يضربوك. وفي واحدة كانت رجلها فيها مشكلة من قبل… كانت تعيط عياط لأنها مش قادرة.

بليل… حوالي 3 أو 4 الفجر… نادوا أسماءنا… وأخذوا بصمات أصابعنا… إصبع إصبع. بعدين كلبشونا إيدينا لورا وغموا عينينا وخلونا بالزقّة فترة… وبعدين باص… وكان معنا شباب… عشان “يروحونا”.

عند معبر كرم أبو سالم نزلونا بمكان فاضي… مش قدّام المعبر مباشرة… نزلونا من بعيد وقالوا: “يلا روحوا”. وإحنا مش فاهمين. وفجأة طلعوا شباب غزة… قالوا: “امشوا معنا… إحنا إخواتكم… امشوا مع بعض وما تخافوش”. وقتها عرفت إني بغزة… أقسم بالله قلت: أشهد أن لا إله إلا الله وأشهد أن محمدًا رسول الله… ودعيت لهم من قلبي.

بعدها إجى الصليب… أخذونا عند الصليب، البنات فوق والرجال تحت… وأخذوا أسماءنا… وقالوا: كل وحدة ترن على أهلها. أهلي كانوا بغزة وما في اتصال… عرفوا بعد أسبوع… وأنا كنت فاكراهم أصلًا ميتين. رنيت على جوزي بعد ما “متت من العياط”… وزبط الإرسال… قال: “هيني جايك”.

أخذونا عند المعبر بالضبط. البنات كل وحدة إجوا أهلها. سائدة كانت أكتر وحدة تعيط… ومع هيك كانت أول وحدة لقت أهلها بيستنّوها. وأنا ظلّيت أستنى… ويمكن ساعة… شباب كانوا يقولوا: “تعالي نروحك… إنت فخر”… وأنا أقول: جوزي حيجي… جوزي حيجي. ولما إجى… حضنّي. أول سؤال سألته: “الولد عايشين ولا ميتين؟” قال: “الحمد لله عايشين”. قلت الحمد لله… أهم إشي أولادي عايشين.

وأول ما شفت أولادي… أحمد كان شايب من الخوف… عمره 5 سنين… أغلب شعره أبيض. اعتدال أول ما شافتني فرحت… وصارت تلزق فيي. أما جودي… قالت “جود… جود”… وبعدين طلعت فيي نظرة وراحت لستها… كأنها مش عارفاني… وبعدها صارت تعيط.

بعد أسبوع زبطت مكالمة مع أهلي… مرت عمي قالت: “إلك مفاجأة”. سمعت صوت أمي… قلت: “ألو يمه”… وانفجرت عياط: “عمري يمه”. أمي تسألني: “إنت بخير؟ ما فيش إشي فيكي؟” وأنا: “والله يمه أنا منيحة… بس إنتوا كيف؟ أمانة انتوا بخير؟ أمانة نسرين بخير؟” قالت: “أختك نسرين… بنعرفش عنها”. وأبوي قال لي: “يا نور عيني… إنت روحي”.

ومن بعد الاعتقال… أولها كانت تجيني كوابيس إني أرجع تاني. وغسان… كنت أحلم فيه كثير… “مش حتطلعي من هون” يقول. مرة قال لي: “إنت مسيحية” عشان اسمي نيفين ونجار… وأنا أقول له: لا… أنا مسلمة. وكان يجي يعطيني أمل وبعدين يقتله… ومرات يقول لي كلام يكسّر: “حنخليك تشوفي أولادك”… وبعدين ولا شي.

صار تأثير الاعتقال واضح عليّ… صرت متعلقة بأولادي أكثر… روحي صارت فيهم… بس صرت عصبية كثير. أنا حنونة عليهم… بس وقت العصبية ممكن أغلط… مرات بضرب أحمد… وأختي تقول لي: إنتِ بدك دكتور. رحت ثلاث أيام… الدكتورة كتبت شهادتي وكل اللي صار… وبعدين حسّيت فش فايدة… كأنه أخذوا الورق وخلاص… فبطّلت أروح.

وبضل جواتي كلمة واحدة: طلعوهم كلهم. حياة الأسرى والأسيرات… أقسم بالله… “موت أحمر”… الموت أهون لهم. بصيروا ينسوا أهلهم… حياتك بلا معنى… بتصيري زي الكلبة بعاملوكي… بيجرّوكي جرّ زي الكلاب. وفجأة تفتيش، فجأة إيذاء… ممكن الساعة 12 بالليل وإنتي نايمة… بس إيذاء. لازم كل الدول اللي برا تقف مع الأسرى… حرام… والله حرام… حرام… حرام.